Жамбылда тау-кен металлургия комбинаты салынады

Жамбыл облысының әкімі Бердібек Сапарбаев "Monterra Qasaqstan" ЖШС басшыларымен кездесіп, тау-кен металлургия комбинатын салу және алтын кен орындарын игеру жөніндегі жобаның іске асырылуын талқыға салды.

"Monterra Qasaqstan" ЖШС 2015 жылы құрылған. Айта кеткен жөн, Monterra Group AG неміс инвестициялық компаниясының еншілес мекемесі болып табылады.

Компания мен Жамбыл облысы әкімдігі арасында​ ​ ​ ​ ​ 2016 жылы тау-кен металлургия комбинатын салу туралы меморандумға қол қойылған балатын. Сол жылы Қаратас-Майбұлақ алаңында алтын мен ілеспе компоненттерді барлауға келісімшарт жасалынған. Бүгінгі таңда Қордай ауданында комбинат құрылысына арнайы жер телімі бөлінді. Жоба Жамбыл облысының Индустрияландыру картасына енгізілген.

Инвестицияның жалпы көлемі 600 миллион еуроны құрайды.

"Monterra Qasaqstan" ЖШС бақылау кеңесінің төрағасы Йоганн Штоль алтын өндірудің бірегей технологиясы қолданылатынын атап өтті. Өзі Қордай ауданының тумасы.​ ​ Жерлестері үшін тұрақты және жалақысы жақсы жұмыс ұсынып, дамыған өндірісті жолға қойғысы келеді.

Қазіргі уақытта компания геологиялық барлау жұмыстарын жүргізуде, объектілерді өнеркәсіптік игеруге дайындауда. "Monterra Qasaqstan" ЖШС Бас директоры Меруерт Данбаеваның айтуынша, «тау-кен металлургия комбинатының құрылысы 2021 жылы басталады». Ал, нысанды 2023 жылы пайдалануға беру жоспарлануда. Содан кейін алтын өндіру жұмыстары жүзеге асатын болады. Компания 1900 адамды тұрақты жұмыспен қамтамасыз етуге ниетті.

Жаңа комбинатта Доре қорытпасы (алтын-күміс қорытпа) өндіріледі. Өндіріс басталғаннан кейін "Monterra Qasaqstan" ЖШС бес тоннаға дейін алтын өндіруді, содан кейін біртіндеп қуаттылықты арттыруды жоспарлап отыр.

Компания ауданның инфрақұрылымын дамытуға да инвестиция салады.

Бердібек Сапарбаев бұл бағытта одан әрі жұмыс істеуді, Қордай ауданы ауылдарының әлеуметтік мәселелерін шешуге жәрдемдесу қажеттігін атап өтті.

Ол экология, кадрларды даярлау мәселелеріне ерекше назар аудару қажеттігін атап өтті.

Облыс әкімі өзінің орынбасары Алмас Мәдиевке инвестициялық жобаны іске асыру бойынша Жол картасын әзірлеуді тапсырды.

​

​Жамбыл облысы әкімінің баспасөз қызметі