1 шілдеден бастап ипотека бойынша шекті мөлшерлеме өзгереді

Реттеуші органдар қарыздар мен микрокредиттерге қатысты жылдық тиімді сыйақы мөлшерлемесінің шекті деңгейін қайта қарап, жаңартты, деп хабарлайды Jambylinfo.kz 

Соған сәйкес, 1 шілдеден бастап ипотекалық несиелердің шекті мөлшерлемесі 25%-дан 20%-ға дейін қысқарады.

Қаржы нарығын реттеу және дамыту агенттігі бұл өзгерістерді Ұлттық банкпен бірлесіп бекітті. Тиісті қаулы 16 мамырдан бастап күшіне енеді, бірақ негізгі өзгерістердің бір бөлігі тек 1 шілдеден бастап қолданылады.

Жалпы алғанда, несиелердің көп түрі бойынша ЖТСМ бұрынғы деңгейде сақталады. Алайда кейбір бағыттарда шектеулер нақты көрсетілген:

кепілсіз банктік қарыздар үшін – жылдық 46%-ға дейін;

кепілмен берілетін банктік қарыздар үшін – жылдық 35%-ға дейін;

ипотекалық тұрғын үй несиелері үшін – 16 мамырдан бастап 25%, ал 1 шілдеден бастап 20%-ға дейін төмендейді.

Осылайша, жаз ортасынан бастап ипотека бойынша пайыздық шектеу айтарлықтай азаяды.

Ал микрокредиттер бойынша өзгеріс жоқ:

жалпы микрокредиттер үшін – жылдық 46%-ға дейін;

45 күнге дейінгі қысқа мерзімді микрокредиттер үшін – күніне 0,3% немесе жылдық 179%-ға дейін.

Бұл ретте мұндай қысқа мерзімді қарыздардың сомасы 45 айлық есептік көрсеткіштен (АЕК) аспауы тиіс.