Нашар басшылар экономикаға зиян келтіреді – зерттеу

Тиімсіз басқару тек жекелеген компаниялардың емес, тұтас ел экономикасының дамуына кері әсер етуі мүмкін, деп хабарлайды Jambylinfo.kz DW.com-ға сілтеме жасап.

ARD таратқан мәліметке сүйенсек, басқару сапасының төмендігі еңбек өнімділігін әлсіретіп, миллиардтаған еуро көлемінде шығынға әкеледі.

Gallup компаниясының 2024 жылғы зерттеуіне сәйкес, Германияда қызметкерлердің небәрі 16 пайызы ғана өз басшыларына толықтай қанағаттанатынын айтқан. Ал 78 пайызы жұмысты тек міндетті деңгейде атқарып, бар әлеуетін жұмсамайтынын мойындаған. Бұл құбылыс еңбек өнімділігінің төмендеуіне тікелей ықпал етеді.

Сонымен қатар, Institut der deutschen Wirtschaft (Неміс экономика институты) жағдайға сәл өзгеше баға береді. Институт сарапшыларының пікірінше, қызметкерлердің көпшілігі өз жұмысына жалпы алғанда риза, сондықтан мотивацияның жаппай құлдырауы туралы айтуға негіз жоқ. Дегенмен, басқарудағы әлсіздік елеулі экономикалық салдарға соқтыруы мүмкін.

Gallup деректеріне сәйкес, жұмысқа немқұрайлы қарайтын, іштей «жұмыстан қол үзген» қызметкерлер Германия экономикасына шамамен 113 миллиард еуро шығын келтіреді. Бұл – елдің жалпы ішкі өнімінің екі пайызынан астамына тең көрсеткіш.

Экономика профессоры Kristina Huhn сапалы көшбасшылықтың маңызын ерекше атап өтеді. Оның айтуынша, білікті басшы ұжымды ынталандырып, қызметкерлердің қабілетін дамытуға және сенімге негізделген жұмыс ортасын қалыптастыруға тиіс. Өз еңбегінің бағаланатынын сезінген адам шығармашыл әрі нәтижелі еңбек етеді.

Сарапшының пікірінше, тиімді көшбасшылық тек жоғары басшылыққа ғана жүктелетін міндет емес. Басқару мәдениеті ұйымның барлық деңгейінде қалыптасуы қажет. Өйткені нағыз көшбасшылық лауазымнан емес, адамдармен жұмыс істеу әдебінен басталады.