Грекия круиздік кемемен саяхаттайтын туристер үшін қосымша салық енгізіп жатыр. Миконос пен Санторини аралдарына түскен кезде әрбір турист 20 еуро төлеуге міндетті болады, ал басқа аралдарда – 5 еуро, - деп хабарлайды Jambylinfo.kz Euronews-ке сілтеме жасап.
Жаңа салық жаздың басынан бастап күшіне енеді.
Грекия үкіметі мұндай шешімді аралдарда, әсіресе Миконос пен Санториниде, туристердің шамадан тыс көбеюімен түсіндіріп отыр. Жиналған қаражат порт инфрақұрылымын жақсартуға жұмсалмақ.
Алайда халықаралық круиздік компаниялар бұл шешімге наразы.
"Біз бұл салықты тым жоғары деп есептейміз. Үкіметтен бұған басқа реакция күткен едік – бізбен бірлесіп шешім іздейді деп ойладық. Бірақ оның орнына бірден жоғары салық енгізіп отыр. Біз әлі де үкіметтің бұл шешімді қайта қарайтынына, біздің елге қосып жатқан үлесімізді ескеріп, бізбен ашық жұмыс істейтініне үміттенеміз", – деді Norwegian Cruise Line Holdings компаниясының үкімет және қоғаммен байланыс жөніндегі директоры Сэнди Вейр.
Круиздік индустрия өкілдері шамадан тыс туризм мәселесін шешудің тиімді жолы – балама бағыттарды дамыту деп санайды, жаңа салықтар емес.
Алдыңғы мақала
Ұқсас жаңалықтар
