Бұл кездесу Армения мен Әзербайжан арасындағы бейбіт келіссөздер процесінің жалғасы болмақ. Бұл туралы Армения Үкіметі басшысының баспасөз хатшысы Назели Багдасарян хабарлады.

Тараптар Таулы Қарабақтағы жанжалдың аяқталуынан кейінгі кезеңде мемлекетаралық қатынастарды реттеуге бағытталған қадамдарды талқылайды.

Кездесу барысында тараптар қауіпсіздік мәселелеріне, мемлекеттік шекараны демаркациялау, көлік дәліздерін дамыту, сондай-ақ аймақтардағы автономия кепілдіктерін қамтамасыз ету мәселелеріне басты назар аударады. Бұл бағыттар бойынша екі ел арасында әлі де айтарлықтай қайшылықтар бар екені белгілі. Соған қарамастан, Ереван мен Баку ресми түрде бейбіт және қалыпты қарым-қатынастарды қалпына келтіруге ұмтылатынын мәлімдеуде.

Бұл кездесу — ұзақ уақыт бойы күрделі және шиеленісті болып келген армян-әзербайжан қатынастарын бейбіт жолмен реттеуге бағытталған маңызды кезеңдердің бірі. Келіссөздерге Біріккен Араб Әмірліктері алаң ұсынғаны бейбіт процестің аймақтық қана емес, халықаралық деңгейде де маңызды екенін көрсетеді.

Мамандардың пікірінше, тараптар нақты келісімдерге келе алса, бұл Оңтүстік Кавказдағы тұрақтылық пен қауіпсіздікті нығайтуға үлкен үлес қосады. Сонымен қатар, аймақтағы көлік және экономикалық инфрақұрылымдардың дамуына жаңа серпін беруі мүмкін.