11 шілде күні Жамбыл облыстық перинаталдық орталығында Жаңатас қаласының тұрғыны Ақерке Талантқызы дүниеге сәби әкелді. Алайда келесі күні нәрестеге «гидроцефалия» - яғни миға сұйықтық жиналуы диагнозы қойылды.

Сәбидің жағдайы облыстық балалар ауруханасының нейрохирургтарының тұрақты бақылауында болды. 30 шілдеде, балаға 19 күн толғанда, Жамбыл облыстық көпбейінді балалар ауруханасында нейрохирург Мирсаид Байматовтың жетекшілігімен сәтті ота жасалды.

  «Сәбиде субкомпенсацияланған формадағы гидроцефалия анықталды. Алдымен компьютерлік томография арқылы зерттеу жүргіздік. Ота МӘМС аясында тегін жасалды. Енді 2-3 күнде анасы екеуі үйіне шығады», — деді дәрігер Байматов.