Қазақстанның кей аймағында коронавирус жұқтырғандар саны артып жатыр. Соған байланысты бұл аймақтарда сақтық шарасында карантин күшейтілді.

Нұр-Сұлтан

Таяуда Нұр-Сұлтанның бас санитар дәрігерінің 13 қазандағы карантинді қатаңдату туралы қаулысы жарияланды. Карантин 14 қазаннан бастап күшіне енді.

Аймақтың бас манитар дәрігерінің ақулысы бойынша, жергілікті атқарушы органдар мен олардың квазимемлекеттік секторы қызметкерлерінің кем дегенде 60 пайызы қашықтан жұмыс істеуге ауысады. Жабық бөлмелерде адамдар көп болатын жеке ұйымдар да жұмысшыларды қашықтағы жұмыс режиміне ауыстыруы керек.

Ал кафелер, мейрамханалар, және басқа да тамақтандыру нысандарының жұмыс уақыты 22:00-ге дейін қысқартылды (09:00-ден 22:00-ге дейін). Жұмыс күндері де, демалыс күндері де солай. Орындар саны 30-дан аспауы қажет.

Азық-түлік емес тауарлар мен заттарды сатуға арналған дүкендердің жұмысына тек жұмыс күндері 18:00-ге дейін рұқсат етіледі.

Жексенбіде қоғамдық көліктердің жұмысы тоқтатылып, автобустарға дезинфекция жүргізіледі.

Алматы

Ал кеше Алматы бас санитар дәрігері Жандарбек Бекшин қаладағы карантин туралы қаулыға қол қойды.

Қаулыға сәйкес мынадай шаралар сақталады: - Бұқаралық іс-шараларға тыйым салу сақталады - Караоке, түнгі клубтар, кинотеатрлар, фудкорт және т. б. жұмыс істемейді - Бизнесмендер қызметкерлердің 30 пайызын қашықтан жұмыс істеуге ауыстыруы керек - Жолаушылар ағынын азайту мақсатында қоғамдық көліктің барынша көп шығуын қамтамасыз ету қажет - Аудан әкімдері мониторинг топтарының жұмысын жандандыруы тиіс - Кіреберістер мен балалар алаңдарын аптасына бір рет дезинфекциялау.

"Барлық күні халыққа әртүрлі мәдени-сауық қызметтерін көрсететін мәдени-демалыс мекемелерінің (караоке, кальян, бильярд, түнгі клубтар, боулинг орталықтары, жабық аттракциондар, тамақтану корттары, кинотеатрлар, ойын-сауық мекемелеріндегі балалар ойын алаңдары мен батуттар), ересектер мен балаларға арналған ойын-сауық мекемелерінің, сондай-ақ демалыс күндері азық-түлік және азық-түлік емес жабық базарлардың жұмысына тыйым салуды сақтау", - делінген қаулыда.

СҚО

Кеше Солтүстік Қазақстан облысында коронавирус жұқтырғандар санының өсуіне байланысты шектеу шаралары күшейтілетіні хабарланған.

СҚО бас санитар дәрігерінің жаңа қаулысы шықты. Шектеулер 16 қазан сағат 00:00-ден бастап енгізілді.

Солтүстік Қазақстанда сауда және ойын-сауық орталықтары, кафе, монша және сауналардың жұмыс уақыты 22:00-ге дейін қысқарады. Қоғамдық тамақтану объектілерінде 50 адамның орнына 30 адамға дейін отыруға рұқсат беріледі. Сенбі-жексенбі күндері тамақтану орындары тек жеткізумен айналысады.

Демалыс күндері туризм объектілері, фитнес-орталықтар, сауда және ойын-сауық орталықтары (ғимараттағы азық-түлік тауарларын сататын орындар мен дәріханаларды қоспағанда) қызметін тоқтата тұрады.

Қоғамдық көліктер де демалыс күндері жұмыс істемейді.

Мемлекеттік органдардың, квазимемлекеттік сектор органдарының, ұлттық компаниялардың, өзге де ұйымдардың, сондай-ақ кәсіпкерлік субъектілері қаулы талаптарын сақтай отырып жұмыс істей береді. Бірақ қызметкерлердің кемінде 50 пайызы қашықтан жұмыс істеуі қажет.

Ал Халыққа қызмет көрсету орталықтары онлайн-форматқа көшеді.

Ақмола облысы

Бүгіннен бастап Ақмола облысында да карантин күшейтілді. Өңірдің бас санитар дәрігерінің қаулысы жарияланды.

Қаулыға сәйкес, 65 жастан асқан азаматтардың далаға шығуына шектеу қойылды. Түнгі сағат 23:00-ден таңғы 06:00-ге дейін коменданттық сағат енгізілді.

Демалыс күндері автобустардың жүруіне тыйым салынды. Ал таксиге екі адамнан артық отыруға болмайды. Саябақтарда үш адамнан артық бірге жүруіне тыйым.

Аумағы 1000 шаршы метрден асатын сауда орталықтары, сауда, ойын-сауық орталықтары мен азық-түлік емес дүкендердің жұмысы шектеледі. Жұмыс күндері сағат 19:00-ге дейін ашық болса, демалыс және мереке күндері жабық болады.

Жұмыс күндері азық-түлік дүкендері мен жабық базарлардың жұмыс уақыты 17:00-ге дейін шектеледі. Олар да демалыс және мереке күндері жұмыс істемейді. Ал азық-түлік дүкендері мен мейрамханалардың жұмыс уақыты сағат 09:00-ден 22:00-ге дейін белгіленді.

5-тен 180-ге дейін оқушысы бар мектептерге сыныпта баланың санын 15-тен асырмай жұмыс істеуге рұқсат етілді.

Атырау облысы

Соңғы бірнеше күн ішінде карантин шараларын күшейтіп, кейін оны жеңілдеткен өңір де бар. 13 қазанда сағат 00:00-ден бастап Атырау облысында карантин шаралары күшейтілген.

Жаңа қаулыға сәйкес, тамақтану орындарының, мейрамханалар мен кафелердің, сондай-ақ ірі супермаркеттердің жұмыс уақыты 22:00-ге дейін қысқартылды. Сауда үйлері де тек 22:00-ге дейін ашық болады. Ал жабық базарлардың жұмыс уақыты 17:00-ге дейін азайды.

Спорт залдарының, фитнес орталықтардың, спорт клубтарының, спорттық-сауықтыру орталықтарының қызметі тоқтатылды.

Атырау облысы бас санитар дәрігері Асылбек Шаровтың айтуынша, шектеу шараларын күшейтуге кейінгі бір аптада өңірде коронавирус жұқтырғандардың көбеюі себеп болған.

Ал бүгін Атырау облысында карантин шаралары жеңілдетілді. Асылбек Шаров кейбір нысанның жұмыс істеуіне рұқсат етті.

"Күшейтілген санитарлық-дезинфекциялық нормаларды сақтай отырып, алдын ала жазылу бойынша сағат 09.00-ден 22.00-ге дейін жалпы сыйымдылығы 30 пайыздан аспайтын, бірақ 50 пайыздан аспайтын бассейндердің қызметіне рұқсат берілсін. Сондай-ақ сағат 22.00-ге дейін жаттығу залдары, фитнес орталықтары, спорт секциялары, спорт-сауықтыру орталықтарының қызметіне рұқсат етілсін", - делінген қаулыда.