«Бармақ басты, көз қысты әрекеттер болған». Серікзат Дүйсенғазының ұлының ісіне қатысты сот үкімі шықты
Оның сөзінше, 3 жарым айға созылған «Елікті парк» соты аяқталды
Ақын Серікзат Дүйсенғазы шаңғы базасында қаза тапқан ұлының өліміне қатысты сот процесі аяқталғанын айтып, жазба жариялады. Оның айтуынша, Ақмола облысы, Зеренді аудандық сотының судьясы Аида Каримова төрағалық еткен сот процессі жәбірленуші тараптың талабын оң нәтижеге шешкен, деп хабарлайды jambylinfo.kz
Серікзат Дүйсенғазы әлеуметтік желідегі парақшасында сот үкімі шыққанымен, «Елікті паркінің» иесі сотталмағанын жазған. Ақынның айтуына қарағанда, парк қожайынының жиені сотталған.
Ол өз жазбасында қарсы тараптың қорғаушыларының айлалы әрекетін атап өтіп, материалдық шығын өтелмегенін жазды.
Сондай-ақ, Серікзат Дүйсенғазы аталған тау-шаңғы кешенінде талай бала мерт болып, соның ішінде Әлиханның ісі ғана сотқа дейін жеткенін айтқан. Ол бұл істе «бармақ басты, көз қысты» әрекеттер болған деп айыптайды.
Естеріңізге сала кетейік, 2023 жылдың 2 қаңтарында Ақмола облысында ақын серікзат Дүйсенғазының баласы шаңғы теуіп жүріп қаза тапқан болатын.