Бюро мәліметіне сәйкес, былтыр туу коэффициенті 1000 адамға шаққанда 19,52 болған. Салыстыру үшін айта кетсек, 2022 жылы бұл көрсеткіш 20,57 болған еді. 

«Туудың ең жоғары деңгейі Маңғыстау (1000 тұрғынға — 26,74 адам), Түркістан облысында (1000 тұрғынға — 26,18 адам) және Шымкент қаласында (1000 тұрғынға — 25,70 адам) байқалды. Орта есеппен репродуктивті кезеңде бір әйелден туған балалар саны, яғни, туудың жиынтық коэффициенті — 2,96», —  делінген Бюро мәліметінде. 

Өңірлік бөліністе туудың ең жоғары коэффициентінің ең жоғары деңгейі Түркістан (4,39), Маңғыстау (3,99) облыстарында, ал ең төменгі деңгей — Солтүстік Қазақстан облысында (1,82) тіркелді. Сондай-ақ қалалық жерде — 2,63 (2022 жылы — 2,76), ауылдық жерде — 3,59 (2022 жылы — 3,59) болды. 

Айта кету керек, Мемлекет басшысы Қасым-Жомарт Тоқаев Қазақстан халқына Жолдауларында демографиялық мәселелерді назардан тыс қалдырған емес. «Әділетті Қазақстанның экономикалық бағдары» атты Жолдауында да Президент демографиялық ахуалды арттыру туралы айтқан еді. 

«Қазақстан – әлемдегі ең жас мемлекеттің бірі. Азаматтарымыздың орташа жасы – 32 жас. Тұрғындардың үштен бірі – жастар. Үкіметтің міндеті – қазіргі демографиялық ахуалды еліміздің бәсекеге қабілетін арттыруға пайдалану. Адал азамат және тұғырлы тұлға болудың негізі бала кезден қалыптасады. Сондықтан біз жас ұрпақтың қауіпсіз әрі алаңсыз өмір сүруін қамтамасыз етуге тиіспіз», - деген еді Президент Жолдауда.