Мобилографтар арасында көшпенділер ойындары туралы промо-ролик түсіруге арналған байқау аяқталды
Бұл туралы Президент кеңесшісі Берік Уәли айтты
Мобилографтар арасында V Дүниежүзілік көшпенділер ойындары туралы промо-ролик түсіруге арналған байқау өз мәресіне жетті, деп хабарлайды Jambylinfo.kz
Берік Уәлидің сөзінше, конкурс нәтижесі көңіл толарлықтай. Сайысқа 2500-ге жуық азамат қатысқан.
- TikTok желісінде 616 видео жарияланып, қаралым саны 5 779 909 жетті.
- Instagram желісінде 636 рилс жарық көріп, 4 587 129 рет қаралды.
- WhatsApp және Telegram статусындағы орташа қаралымдар – 80 000.
- Жасырын қаралымдар – 19 000.
- YouTube Shorts: қаралым саны – 6 249 178.
Көшпенділер ойындары туралы түсірілген видеолардың жалпы қаралымы – 16 715 216.
Бір қуантарлығы, видеолар ел ішінде өте жылдам таралып жатыр. Мысалы, бір промо-ролик бір күнде 6 миллион рет қаралған. Бұл – үлкен көрсеткіш. Сондықтан байқау аяқталғанға дейін видеолардың қаралымы да арта түсетіні сөзсіз.
Байқаудың қорытындысы келесі аптада шығады.