Су тасқынының екінші кезеңімен күресіп жатқан БҚО-да төрт ірі су қоймасы 90 пайызға толған - «Қазсушар»
Республикадағы су қоймаларының басым бөлігі 100 пайыз толған
«Қазсушар» Батыс Қазақстан филиалының мамандары тасқын суын қауіпсіз өткізу іс-шараларын атқарып жатыр. Аймақта су тасқынының екінші кезеңі жалғасуда. Облыстың төрт ірі су қоймасы 90%-ға толған. Бұл туралы «Қазсушар» республикалық мемлекеттік кәсіпорны мәлімдеді,-деп хабарлады jambylinfo.kz.
Орал қаласындағы Жайық өзенінің деңгейі 838 см жетіп, бір тәулікте 8 см-ге төмендеген.
«Қазсушар» мекемесі таратқан ақпаратқа сүйенсек, Ақмола облысында Астана және Сілеті су қоймалары 100%-ға толған. Екі нысан да штаттық кестеге сай жұмыс істеп тұр. Аймақта су тасқынының белсенді кезеңі аяқталып, Астана контрреттегішінен Есіл өзеніне тәулігіне 4,75 млн текше метр су жіберіліп жатыр.
Солтүстік Қазақстан облысындағы 2 ірі су қоймасы 100%-ға толған және транзиттік режимде жұмыс істеп тұр. Қазір Есіл өзенінде су тасқынының екінші кезеңі жалғасуда.
Сондай-ақ Абай облысында Шүлбі су қоймасы 40%-ға толса, Қарағанды облысында 3 ірі су қоймасы 98,4%-ға толған.