«Дипломмен ауылға» баратын жастарға 9,2 млн теңгеге дейін несие беріледі
Ауылдық жерге жас мамандарды тарту мақсатында «Дипломмен ауылға» жобасы бойынша бюджеттік кредит мөлшері 1 500-ден 2 500 айлық есептік көрсеткішке дейін ұлғайды. Бұл туралы бүгін үкімет отырысында премьер-министрдің орынбасары, Ұлттық экономика министрі Нұрлан Байбазаров мәлім етті, деп хабарлайды jambylinfo.kz.
Қазақстандағы ауыл мәселесі талқыланған бүгінгі отырыста Ұлттық экономика министрі ауылдардың жағдайы, ондағы халықтың тұрмыс тіршілігі туралы баяндама жасады. Оның айтуынша, қазір республикамызда 6 256 ауылда 7,6 млн. адам тұрады. Бұл жалпы еліміздегі халық санының 38,4%-ын құрайды.
Оның айтуынша, министрлік жыл сайын Өңірлік стандарттар талаптарына сәйкес ауылдардың қамтамасыз етілуіне мониторинг жүргізеді. Жалпы ауыл тұрғындарының өмір сүру сапасын жақсарту және Өңірлік стандарттармен қамтамасыз ету деңгейін арттыру үшін Министрлік мүдделі мемлекеттік органдармен және әкімдіктермен бірлесіп бірқатар жүйелі шаралар қабылдайды.
Ал, «Ауыл аманаты» жобасы аясында 79 млрд теңгеге 12,7 мың жеңілдетілген шағын несие берілген. Облыстардың ерекшелігіне сәйкес ауылдық аумақтарды дамыту бойынша Жол карталары бекітілді. Ауылдық жерге жас мамандарды тарту мақсатында «Дипломмен ауылға» жобасы бойынша бюджеттік кредит мөлшері 1 500-ден 2 500 айлық есептік көрсеткішке дейін ұлғайды және басқа да іс-шаралар іске асырылды», - дейді ол.
Айта кетейік, 2024 жылы айлық есептік көрсеткіш 3692 теңге, соған сай, 2500 айлық есептік көрсеткіш 9,2 млн теңгеге шақ.