Жамбыл облысының әкімі Қазақстан чемпионатының жүлдегерлерін қабылдады
Кездесуде облыс әкімі спортшыларды құттықтап, оларға қаржылай сыйлықтар табыс етті
Облыс құрамасы Астанада өткен ҚР чемпионатында грек-рим күресінен 1 алтын, 1 күміс, 1 қола медаль алса, еркін күрестен 2 алтын, 3 күміс, 1 қола медаль иеленген, деп хабарлайды jambylinfo.kz.
Ербол Қарашөкеев атап өткендей, облыс құрамасы еркін күрестен командалық есепте екінші жыл қатарынан топ жарып келе жатыр.
Сондай-ақ, облыс әкімі ҚР чемпионатының қола жүлдегерлеріне 300 мың теңге, күміс жүлдегерлерге 500 мың теңге, алтын иеленген спортшыларға 1 миллион теңге сертификатын табыстады. Ал, грек-рим күресінен U-23 жасқа дейінгі спортшылар арасындағы тұңғыш Әлем чемпионы Сұлтан Әсетұлына 2 миллион теңге табысталды.
Жиында спорт саласындағы бірқатар мәселелер айтылды. Спорт жанашырлары Ербол Қарашөкеевке облыстағы грек-рим күресінде жасөспірімдер сирегенін айтып, басқарма тарапынан насихаттау жұмыстары жүргізілсе деген ниет танытты.