Жамбыл облысындағы жаппай тәртіпсіздікте ауыл әкімі таяқ жеген. Талас ауданына қарасты Қасқабұлақ ауылына бірнеше күн бұрын бір топ адам түн жарымда төбелес шығарған еді. Осы оқиғадан кейін облыс әкімінің өзі елді-мекенге арнайы барып, жұртты сабырға шақырды, деп хабарлайды КТК телеарнасы. Бердібек Сапарбаев, Жамбыл облысының әкімі:

- Осының бәрі осымен қалу керек. Қайталанбау керек. Онсыз болмайды. Бірінші – жауапкершілік, міндет, ол – ата-ананың міндеті. Қазақ айтады: "Ұяда не көрсең, ұшқандай соны ілесің". Барлық тәрбие ананың сүтімен келеді. Ең негізгі міндетіміз – өсіп келе жатқан жастарға дұрыс тәрбие беріп, соны сақтауымыз керек.

Бес-алты көлікке мінген жастар ауылға баса-көктеп кіріп, үйлерді таспен атқылапты. Бес үй мен клубтың терзесі сынған. Ал оларды тоқтатуға ауыл әкімі шыққанымен, соққыға жығылып тынған. Абырой болғанда, жарақаты жеңіл. Өзге жапа шеккендер жоқ. Полицейлер елдің үрейін алған 14 адамды ізін суытпай ұстап, қамауға алды. Олардың неліктен мұндай қадамға барғаны тексерілуде. Қазір бұзақылық бабымен іс қозғалып, тергеу жүргізіліп жатыр. Ауылдағы ахуал қазір тұрақты. Тимур Жаңабаев, Талас аудандық ПБ бастығы:

- 14 адамды ізін суытпай ұстады. Ұсталғандар Талас аудандық полиция бөліміне жеткізілді. Аталған дерекке қатысты ҚР ҚК 293-бабымен бұзақылық дерегі бойынша сотқа дейінгі тергеу басталды.