Бүгін Жамбылда «AMANAT» партиясының облыстық филиалы бастамашы болған «AMANAT PIKIR»  диалог алаңының бірінші жиыны өтті, - деп хабарлайды  Jambylinfo.kz
 Диалог алаңының алғашқы басқосуы рухани құндылықтар мен той мәдениетіне сондай-ақ, еңбек адамдарының жұмысын насихаттауға арналған. 
Жиынға Жамбыл облысы әкімінің орынбасары Серік Сәлемов, «AMANAT» партиясы Жамбыл облыстық филиалының төрағасы Дауыл Бейсенқұлов, облысымыздың зиялы қауым және аға буын өкілдері, той саласында қызмет жасап жүрген асабалар мен әншілер, жастар қатысты.

Диалог алаңының алғашқы жиынында «Ұрпақтар сабақтастығы», «Той мәдениеті», «Руханият және мәдениет», «Еңбек адамы» деп аталатын панельдік секциялар арқылы негізгі мәселелер тереңінен қозғалып, ұтымды ой, пайымды пікірлер айтылды. 
Пікіталас барысында мәдени саланың қызметі, орны мен рөлі негізге алына отырып, жастарды рухани тәрбиелеу жолдары қарастырылды. 
Пленарлық отырысқа қатысқан облыс әкімінің орынбасары Серік Сәлемов іс-шараның маңыздылығына тоқталып, өңірде руханият пен мәдениетті дамыту күн тәртібінен түспейтін мәселе екенін атап өтіп, атқарылып жатқан жұмыстарға да тоқталды. 

Өңірде биыл «Әулиеата – кітап оқитын өңір» жобасы бастау алды. Бастаманы аймақ жұрты қолдап, түрлі іс-шаралар өткізілуде. Бұл – ұлттық мәдениетке, білімге бет бұрудың жарқын көрінісі. Сондай-ақ «Тектұрмас» әдеби-мәдени, тарихи-ғылыми журналы жарық көрмек. «Әжемнің ертегісі» жобасы барлық балабақшаларда жүзеге асуда. Той мәдениетін қалыптастыру жұмыстары қолға алынғанын білесіздер. Сонымен қатар Ұлы жеңістің 80 жылдығына орай облыс орталығында Бауыржан Момышұлының музейін ашу жоспарлануда,- деді Серік Сәлемов. 

Бұдан кейін панельдік сессияларда айтылған ұсыныстар тыңдалды. «Руханият және мәдениет» панельдік пікірталас ұсыныстарын Ш.Уәлиханов атындағы облыстық ғылыми әмбебап кітапханасының директоры Эльмира Әбдінова жеткізді. Ол Таразда жастарды музыкалық өнерге баулуға арналған орталық салу, сонымен қатар оқыту жүйесі  ұлттық әдеби-мәдени құндылықтарға негізделген колледж ашу керек екенін жеткізді. 
Сонымен қатар, «Той мәдениеті» секциясындағы ұсыныс-тілекті «Jambyl» телеарнасының шеф редакторы Жалғас Қошқарбай, «Еңбек адамы» секциясындағы пікірталас нәтижесін Оралхан Дәуіт айтты. 

Диалог алаңы пленарлық отырыспен қорытындыланып, панельдік секцияларда айтылған пікірлерден туған ұсыныстар жинақталды. Нәтижесінде арнайы үндеу қабылданды.