«Ұлттық жол активтерінің сапасын арттыру орталығы» республикалық мемлекеттік кәсіпорны облыстық филиалымен ағымдағы жылдың 10 айында республикалық және жергілікті маңызы бар жолдарға 689 рет тексеріс жұмыстарын жүргізген. Есепті кезеңде жүргізілген жұмыстардың нәтижесінде 1576 сынама алынып, оның ішінде 182-сі нормативтік талаптарға сәйкес келмегендігі анықталған. Жалпы, мамандар 10 ай ішінде республикалық деңгейдегі 31 объектіге 542 рет шығу жұмыстарын ұйымдастырса, жергілікті желі бойынша 153 объектіге 147 рет шыққан. Нәтижесінде, бас-аяғы 178 кемшілік анықталса, оның 46-сы өрескел екендігі белгілі болған. Ал бұзушылықтардың басым бөлігі жабындағы жарықтар, шұңқырлар мен шөгінділерге байланысты. Атап өтерлігі, бүгінгі таңда барлық ескертулер жойылған.