ҚР Үкіметінің "Теміржол вокзалы кешенін және кейбір теміржол станцияларын қайта атау және кейбір теміржол станциялары атауларының транскрипциясын өзгерту туралы" қаулысы жарияланды. Еліміздің бірнеше өңіріндегі теміржол бекеттерінің атауы өзгертілді: Ақмола облысында "Астана Нұрлы жол" теміржол стансасы енді "Нұр-Сұлтан Нұрлы жол" , ал ОП-39 стансасы - Өндіріс деп аталады. Ақтөбе облысында Компала станциясы - Көкала деп өзгертілді. Жамбыл облысындағы Луговой станциясы енді  – Түрксіб деп аталады. Қарағанды облысында Весна темір жол станциясы Ақжолтай, ал аралық станция – Мыңбала деген атауға ие болды. СҚО-дағы  Новоишим станциясы -Жаңаесіл, ал Володарское станциясы -Саумалкөл деп аталды. ШҚО-да да жаңалықтар бар. Серебрянка станциясы - Күмістау, Селезновка – Көкжиек, Огневка – Таусамалы, Зырян – Алтай теміржол станциясы деп аталды. Сонымен қатар, елордадағы жаңа кешен – Нұрлы жол теміржол вокзалы кешені деп аталды. Аймақтардағы бірнеше станция атауларының транскрипциясы да өзгертілді. Мысалы, Жамбыл облысында Құмшағал станциясы Құмшағыл, Ақыр-Төбе – Ақыртөбе деп жазылады. Толық тізіммен сілтеме бойынша танысуға болады. Қаулы алғашқы ресми жарияланған күнінен бастап қолданысқа енгізіледі.