Луговойдың «гареміндегілер» газсыз отыр

Ғылым – техниканың қарыштап дамыған заманында көгілдір отынсыз, түнгі жарықсыз, асфальт жолсыз отырған ауылдарды әлі де көптеп кезіктіруге болады. Алысқа бармай-ақ Т.Рысқұлов ауданы, Луговой ауылына барсаңыз, бұл көрініс көзіңізге оттай басылады. Қазіргі жағдайына қарасаң, өткен ғасырда қалып кеткендей көрінетін Ынтымақ көшесінде қазіргі таңда 49 отбасы тұрады.

Бізге хабарласып, көшелерінде түнгі жарықтандыру да, ауылда бар газдың Ынтымақ көшесінде жоқ екенін айтқан тұрғындар жақында ғана жолға тас төселгенін жеткізді. Бірақ беті әлі асфальтталмаған. Ал жаяу жүргінші жолы баз баяғы қалпында. Мектеп 2 шақырым қашықтықта орналасқандықтан кішкентай балалар жауын-шашынды күндері лай кешіп баруға мәжбүр.

Көшенің жағдайын көзбен көріп, ауыл әкімінен мән-жайын білмекке барғанымызда да біраз тұрғын жиналып, базыналарын айтып үлгерді.

Ал Луговой ауылының әкімі Мұрат Сванов көгілдір отынды көшеге тұрғындардың өздері тартатынын айтады.

Анығында бұл көшедегі 54 үйдің 49-ында отбасы қоныстанған. Олардың 12-сі көпбалалы отбасына жатады. Және мұнда 5 мүгедек азамат, 17 зейнеткер бар. Сондықтан да көгілдір отын үшін 500 мың теңге тауып беруге бәрінің қалтасы көтере бермейтіні анық.

Ал ауылдағы бар көгілдір отынды көшеге кіргізу үшін ауыл әкімі тұрғындарды бірлесіп жұмыс істеуге шақырды.

  Қамар Қарасаева

Т.Рысқұлов ауданы