Жамбыл облысында ауыл әкімі көшеге өз әкесінің атын бергізген. Шенеунік бұл қадамға бару үшін алаштың ардақтысы Сәкен Сейфуллиннің атын көшеден алдырып тастаған көрінеді. Бұл туралы ҚР Парламентінің экс-депутаты Мұхтар Тінікеев өзінің Facebook парақшасында жариялады.

“Жамбыл облысы Мыңарал ауылында С. Сейфуллиннің атындағы көшені өзінің әкесі немесе туысы С. Қашқынбековтың атына ауыстырған.

Бірақ мен қазақты руға, жүзге немесе нағыз қазақ деп бөлмеймін. Бірақ мен тарихи тұлғаның есімі берілген көше атауының өзгеруіне қарсымын”, – деп  жазды М. Тінікеев.

Мыңарал ауылының әкімі расымен де көшеге өз әкесінің атын бергізген болып шықты. Бірақ ол осыдан 17 жыл бұрын болған. Сол жылдары Мыңаралда әкім болған Талғат Қашқынбековтың әкесі ҰОС және еңбек ардагері болып шықты. Мойынқұм ауданы әкімінің орынбасары Амангелді Нәметқұловтың сөзінше, тарап жатқан ақпарат шындыққа жанаспайды.

“Аталған жағдайдан кейін архив құжаттарын көтерткіздік. Бұл жағдай бұрын ауыл тұрғындарының өтінішімен ауысқан. Сейфуллиннің атын ешкім алып тастаған жоқ. Талғат қазір әкім емес, оның Нұр-Сұлтан қаласынан туыстары келген. Қонақтарға бәрін түсіндірдім. Ардагерге берілген көше шет жақта, ол көшеде бұрын атау болмаған”, – деді аудан әкімінің орынбасары Амангелді Нәметқұлов.