Түлектер соңғы қоңырауда оқыс оқиғаға тап болса кім жауап береді
Биыл Жамбылда 12 мыңнан аса түлек оқу бітіреді
Облыстық білім басқармасы басшысының орынбасары Мұхит Нысанбаев мектеп түлектері соңғы қоңырау шарасында оқыс оқиғаға тап болса, мектеп әкімшілігі жауап беретінін айтты, деп хабарлайды jambylinfo.kz
Мұхит Нысанбаевтың айтуынша, биыл облыста оқу жылын 498 мектепте 248 мыңнан астам оқушы аяқтаса, оның 12 мыңнан астамы түлектер. Осы орайда басқарма өкілі әр мектепке салтанатты шараны креативті идеяларымен ерекше форматта өткізуді ұсынып отыр.
Сонымен қатар, түлектердің бас амандығы үшін іс-шараларды өткізу туралы барлық оқу ұяларына ұсынымдар таратылған.
Осы орайда басқарма өкілінен jambylinfo.kz тілшісі соңғы қоңырау салтанаты кезінде түлектер оқыс оқиғаға тап болса, кім жауап беретінін сұрады.
Соңғы қоңырау кезінде орын алатын түрлі жағдайдың алдын алу үшін полицейлер де ерте қамдана бастаған. Бүгінгі күні бала қауіпсіздігін қамтамасыз ету үшін кезекшіліктер ұйымдастырылып жатыр.
Полиция майоры салтанатты іс шараға байланысты Жамбыл облысы Полиция Департаменті тарапынан полиция қызметкерлері күшейтілген бағыттағы жұмыс істейтінін айтты.