Таразда «Шоқтығы биік Шона» атты республикалық ғылыми-практикалық конференция өтті
Жиынға ҚР Президентінің Кеңесшісі Мәлік Отарбаев қатысты
Жамбылда сатирик-жазушы Шона Смаханұлының туғанына 100 жыл толуына орай «Шоқтығы биік Шона» атты республикалық ғылыми-практикалық конференция өтті, деп хабарлайды Jambylinfo.kz
Конференцияға Жамбыл облысының әкімі Ербол Қарашөкеев, ҚР Президентінің кеңесшісі Мәлік Отарбаев пен Жазушылар одағы басқарма төрағасының орынбасары Қасымхан Бегманов, белгілі қаламгерлер, жергілікті атқамінерлер мен тұрғындар қатысты.
Жиында облыс әкімі Ербол Қарашөкеев сөз сөйлеп, Шона Смаханұлының шығармашылығы мәңгі өлмейтінін, келер ұрпаққа қалдырған мол мұрасының қазақ әдебиетінен ойып тұрып орын алатынын атап өтті. Сонымен қатар, іс-шараның маңыздылығына тоқталды.
Бұдан кейін Мәлік Отарбаев конференция қатысушыларына 100 жылдық мерейтойға арналған Президент Қасым-Жомарт Тоқаев пен ҚР Мемлекеттік кеңесшісі Ерлан Қариннің құттықтау хатын оқыды.
Ғылыми-практикалық конференцияда белгілі сатирик-қаламгерлер мән-маңызы бар баяндама жасап, Шона Смаханұлының шығармашылығы жөнінде ой өрбітіп, қазақ әдебиетінің жай-күйі жөнінде өзекті мәселелерді ортаға салды.