Жекеменшік инвестор Мейірбек Жүнісовтің айтуынша, бүгінге дейін туристік объектіге 4 млрд. теңгеден астам жеке қаражат, екінші деңгейлі банктердің несие ресурстары мен өзге де қаржы жұмсалған. Қазір мұнда негізгі құрылыс жұмыстарының 90 проценті атқарылған. «Батыс Еуропа-Батыс Қытай» халықаралық көлік дәлізінен тау-шаңғы базасына дейін 8 шақырымға жуық автомобиль жолы салынып, электр желісі мен жарықтандыру бағандары орнатылған, газ құбыры жеткізілген. Туристерге арналған мейрамхана, сервистік орталық, бес машинаға шақталған гараж, үлкен және кіші арқанжолдар, сырғанау жолақтарының құрылысы аяқталып, кварталішілік газ құбыры мен жарықтандыру желісі тартылған.