Жуалы ауданында Шерхан Мұртаза музейінің аумағы абаттандырылды
Бүгін, 29 сәуір күні Жуалы ауданының Талапты ауылындағы Шерхан Мұртаза музейінде ауқымды сенбілік өтті, деп хабарлайды jambylinfo.kz.
Шерхан Мұртаза көрнекті тұлға болып қалыптасқан кезінде де өзінің туған топырағынан қол үзген жоқ. Тоқсаныншы жылдардың орта шенінде Жуалы ауданына қарасты Талапты ауылынан арнайы үй салынып берген болатын. Талапты – жазушының туған ауылы. Екі қабатты, еңселі ғимарат қазіргі күні музейге айналған.
Акция аясында Шерхан Мұртазаның әдеби-мемориалдық музей-үйінің аумағына тазалық жұмыстары жүргізіліп, әктеу, сырлау жұмыстары мен қатар, қураған ағаштар кесілді.
Қазақ әдебиетінің қызыл жебесі Шерхан Мұртазаның әдеби-мемориалдық музей-үйінің аумағына жүргізілген сенбілік жұмыстарына зиялы қауым өкілдері, ардагерлер, аналар алқаларының мүшелері, жастар және белсенділер жұмылдырылды.
Жалпы, Жуалы ауданында тазалық акциясына 5000-нан аса адам қатысып, «Жасыл аймақ» апталығында 3000-ға жуық ағаш көшеттері егілді. Полигондарға 53 тонна қоқыс шығарылды.