2022 жылы 719 бала жыныстық қол сұғушылық қылмысының құрбаны болды

2022 жылы 719 бала жыныстық қол сұғушылық қылмысының құрбаны болды. Мұндай дерек «Ашық» НҚА порталында жарияланған 2023-2025 жылдарға арналған «Бала қорғау» кешенді жоспарында келтірілген, деп хабарлайды Жамбылинфо ҚазАқпарат сайтына сілтеме жасап. «2022 жылы кәмелетке толмаған 719 бала (2020 жылы – 833, 2021 жылы – 920) жыныстық қол сұғылмаушылыққа қарсы қылмыстардың құрбаны болды. Жыныстық қол сұғылмаушылыққа қатысты қылмыстардың өсуі Павлодар облысында 57 (23-тен 36-ға дейін), Ақтөбе облысында 48 (21-ден 31-ге дейін), Маңғыстау облысында 9 (32-ден 35-ке дейін), Солтүстік Қазақстан облысында 6 (31-ден 33-ке дейін) және Алматы қаласында 15 пайыз (46-дан 53-ке дейін) өскені байқалады», - делінген құжатта. Жыныстық қол сұғылмаушылыққа қарсы қылмыстардың ең көп саны Алматы (87), Қарағанды (70) және Түркістан облыстарында (63) тіркелген. «Барлығы 3 жыл ішінде жыныстық қол сұғылмаушылыққа қарсы 2 472 қылмыс жасалды. Сонымен қатар, Ішкі істер органдарының есебінде 9 мыңға жуық қолайсыз отбасы тұр, онда 12 мыңнан астам бала тәрбиеленуде», - делінген кешенді жоспарда.