Жамбыл облысы Сарысу ауданының Жаңаарық ауылдық округі соңғы жылдары үлгілі ауыл атағына үміткер болып отыр. Бұл ауылдық округтің басты ерекшелігі – тұрғындар арасындағы ынтымақ, тәртіп пен құқықтық мәдениеттің жоғары деңгейде болуы. Округке қарасты Ақтоғай және Ұзақбай Сыздықбаев ауылдарына 1700-ге жуық адам қоныстанған. Ауыл тұрғындары өзара татулықты сақтай отырып, ұрпақ тәрбиесіне ерекше мән беріп келеді.

Ауылдың басты жетістіктерінің бірі – соңғы төрт жыл ішінде бірде-бір қылмыстың тіркелмеуі. Бұл көрсеткіш ауылдық округтің тұрғындарының заңға бағынушылығы мен қоғамдық қауіпсіздікті қамтамасыз ету жолындағы бірлескен жұмысының жемісі. Ауылда тәртіпті сақтауға тек құқық қорғау органдары ғана емес, барлық тұрғындар үлес қосады.

Алкоголь мен темекіге қарсы бірлескен шешім

Жаңаарық ауылдық округінің ерекше бастамаларының бірі – дүкендерде алкоголь мен темекі өнімдерін сатуға тыйым салу. Округтегі үш дүкенде бұл өнімдер мүлдем сатылмайды, ал жуырда ашылатын төртінші дүкеннің иесі де бұл бастаманы бірден қолдап, ауыл тұрғындарының талаптарына сәйкес қызмет көрсетуді шешті. Бұл бастаманы тұрғындар жас ұрпақты жаман әдеттерден сақтап, оларды дұрыс жолға бағыттау үшін қабылдады. Нәтижесінде ауылдағы құқық бұзушылықтар мен отбасылық жанжалдар айтарлықтай азайды.

Ауыл тұрғындарының айтуынша, алкоголь мен темекі өнімдерін сатпау арқылы отбасылық құндылықтарды нығайтуға және жастардың зиянды әдеттерден аулақ болуына мүмкіндік туып отыр. Әсіресе, жасөспірімдер арасында құқық бұзушылықтың алдын алу үшін бұл шешімнің оң әсері байқала бастады. Жаңаарық тұрғындары бұл бастаманы мақтан тұтып, болашақта да оны қолдай бермек.

Учаскелік инспектордың рөлі

Ауылдық округтегі тәртіпті сақтауда учаскелік полиция инспекторы Сағынғали Саламатовтың үлесі ерекше. Саламатов 5 жылдан бері Ұ.Сыздықбаев ауылында тұрып, өзіне жүктелген аумақтың ахуалын толық бақылауда ұстап келеді. Оның негізгі міндеті – құқық бұзушылықтардың алдын алу және тұрғындарға қауіпсіз орта қалыптастыру.

Инспектордың атқаратын жұмысы жүйелі түрде жүргізіледі. Ол ауылдағы рейдтерді жиі өткізіп, құқық қорғау органдарында есепте тұрған адамдарды тұрғылықты мекенжайы бойынша тексеріп отырады. Сонымен қатар, азаматтық қару иелерін бақылау шараларын қадағалап, заң талаптарын бұзбауын қатаң бақылайды.

Сағынғали Саламатовты ауылдағы барлық тұрғындар жақсы таниды және оған толық сенім артады. Егер ауылға сырттан қонақ келсе, тұрғындар бұл туралы учаскелік полиция инспекторына дереу хабар береді. Бұл ауылдағы құқықтық мәдениеттің және полиция мен тұрғындар арасындағы сенімді қарым-қатынастың айқын дәлелі. Инспектор мен тұрғындардың бірлескен жұмысы құқық бұзушылықтардың алдын алып, ауылдағы қауіпсіздікті қамтамасыз етуде маңызды рөл атқарады.

Ауылдың болашаққа деген сенімі

Жаңаарық ауылдық округі өзінің әлеуметтік, құқықтық және мәдени жетістіктерімен үлгілі ауыл атағына лайықты екенін дәлелдеп келеді. Ауылда құқықтық тәртіпті сақтауда тұрғындар мен құқық қорғау органдарының бірлескен еңбегі, сондай-ақ зиянды әдеттерге қарсы күресте қабылданған батыл шешімдер айтарлықтай нәтиже беруде. Бұл ауыл үлгі ретінде басқа өңірлерге де жол көрсетіп, құқықтық тәртіпті сақтаудың, салауатты өмір салтын қалыптастырудың үлгісі бола алады.

Тұрғындар арасында қалыптасқан ынтымақ пен сенім, учаскелік инспектордың жанқиярлық қызметі ауылдағы тұрақтылықты сақтап, алдағы уақытта да Жаңаарық ауылдық округінің жарқын болашағына кепіл болары сөзсіз. Бұл жетістіктердің арқасында ауыл үлгілі ауыл атағын иеленуге толық мүмкіндігі бар.