Алматы қаласының полициясына алты бірдей нысанға бомба қойылғаны туралы хабар түсті. Алматы қалалық Полиция департаментінің мәліметінше, бомба қойылғаны туралы хабар түскен бойда алты объектіде тексеру жүргізілгенін мәлімдеді. Атап айтқанда, үш банк, Қазақ-Британ техникалық университеті, автоорталық және әуежайға бомба қойылғаны туралы ақпарат түскен. «Қазіргі уақытта бес нысан тексеріліп, ақпараттың жалған екені анықталды. Тағы бір нысанда, яғни қаладағы банктердің бірінде тексеру жұмысы жалғасып жатыр», – деп хабарлады полиция.