Шара жастар арасында құқықтық білімді арттыру, сондай-ақ заңға бағынудың және қаржылық қауіпсіздікті қамтамасыз етудің маңыздылығын түсіндіру бағытында маңызды қадам болып табылды, деп хабарлайды Jambylinfo.kz 

Бүгін М.Х.Дулати атындағы Тараз өңірлік университетінде ҚР Қаржылық мониторинг агенттігінің құрылған күніне орай жастардың қаржылық сауаттылық деңгейін арттыру, сондай-ақ интернет желісіндегі құқыққа қарсы контент жарияланымдарының алдын алу мақсатында «Заң және тәртіп: Қаржы пирамидаларын қалай тануға болады, дропперлер кім және заңды қалай бұзбауға болады» тақырыбында іс-шара өтті.

Шараның басты мақсаты – Мемлекет басшысының Жолдауында айтылған «Заң және тәртіп» нормативі аясында қаржы пирамидаларының, дропперлік әрекеттердің және краудфандингтің негізгі белгілерін, сондай-ақ заңнама нормаларын жастар арасында насихаттау болды. Іс-шарада жастарды қаржылық алаяқтықтан қорғау және заңды бұзбаудың маңыздылығын түсіндіру ерекше назарға алынды.

Іс-шараға Жамбыл облысы бойынша Экономикалық тергеп-тексеру департаментінің қызметкерлері, қаржы мониторинг органдарының ардагерлері және құқық қорғау органдарының өкілдері қатысып, өз тәжірибелерімен бөлісті. Олар жастарға қаржы пирамидаларын танудың жолдары, заңсыз әрекеттерден сақтану тәсілдері және заңды жолмен ақша табудың маңыздылығы туралы кеңес берді. Сонымен қатар, құқыққа қарсы интернет контентті анықтау және оған қарсы әрекет ету мәселелері де талқыланды.

Іс-шара соңында қатысушылар өз сұрақтарын қойып, сала мамандарымен пікір алмасу мүмкіндігіне ие болды.

Бақытжан Бекболат