Бұл туралы Астана қаласының Цифрландыру және мемлекеттік қызметтер басқармасының басшысы Дидар Сүлейманов мәслихат отырысында мәлімдеді, - деп хабарлайды Jambylinfo.kz

Оның айтуынша, "Сергектің" орнына жасанды интеллект негізінде қалалық инфрақұрылымды басқарудың жаңа жүйесі іске қосылады. Жоба халықаралық Presight компаниясымен бірлесіп жүзеге асырылады.

Жаңа жүйені әзірлеу барысында қолданыстағы жүйенің кемшіліктері ескерілген. Атап айтқанда, тұрақты электр қуатымен қамтамасыз ету және бейнебақылау камераларын оптикалық байланыс желісіне қосу қарастырылған. Бұл бейнеағынды үздіксіз беруге мүмкіндік береді. Сондай-ақ қазіргі таңда операторлар бірнеше WMS-жүйелерін пайдаланса, жаңа жоба аясында бірыңғай бейнеағын беру жүйесі енгізіледі, бұл мониторинг тиімділігін арттырады.

Жоба аясында:

22 000 бейнебақылау камерасы орнатылады,

732 аппараттық-бағдарламалық кешен жол қиылыстарына,

470 кешен сызықтық учаскелерге орналастырылады.
Жаңа жүйе жол қозғалысы ережелерін бұзудың 15 түрін және 35 түрлі бейнеаналитиканы тіркейді.

Жоба 2030 жылға дейін жоспарланған, оның жалпы инвестиция көлемі – 53 миллиард теңге. Қаржыландыру толығымен жеке серіктес есебінен жүргізіледі, ал жұмыстардың 60%-ын қазақстандық компаниялар атқарады. Инвесторға төлемдер нысан толық пайдалануға берілгеннен кейін ғана жасалады.