Аймағамбетов бекіткен «Алтын белгіге» үміткерлер үшін енгізген талапты жаңа министр алып тастамақ

Қазақстанда «Алтын белгіге» үміткерлер НЗМ негізінде математикадан емтихан тапсыру керек деген талапты алып тастайды. Ашық НҚА порталында білім алушылардың үлгерімінің ағымдағы мониторингін, аралық және қорытынды аттестациясын жүргізудің үлгілік қағидаларына түзетулер жобасы қоғамдық талқылауға ұсынылды. 2022 жылдың мамыр айында бұрынғы білім министрі Асхат Аймағамбетов «Алтын белгі» үміткерлерін объективті және ашық бағалау мақсатында емтихандардың бірі тәуелсіз білім беру ұйымында өтетінін мәлімдеген. «Талапкерлер НЗМ базасында математикадан емтихан тапсыруы керек. Бұл шара академиялық адалдықты қамтамасыз ету үшін қабылданғанын түсінуіміз қажет. Бұл ретте НЗМ-де оқитындар мен жалпы білім беретін мектепте оқитындар үшін тапсырмалар бірдей болатынын айтқым келеді», – деді сол кездегі министр Асхат Аймағамбетов. Жаңа ереже бойынша бұл талап «қорытынды аттестаттау кезінде білім алушыға қолайлы жағдай жасау» мақсатында алынып тасталды. Сонымен қатар, 2023 жылдың 1 қыркүйегінен бастап 5-8, 10-сыныптарда қазақ тілінен емтиханды енгізу ұсынылып отыр. Емтихан Мемлекеттік білім стандартына сәйкес жазбаша және ауызша мектептегі оқу бағдарламасын меңгеру нәтижелері бойынша (тыңдау (тыңдау), айтылым, оқылым, жазылым) өткізіледі. Емтиханның уақытын білім беру ұйымының педагогикалық кеңесі белгілейді. Тапсырмаларды оқытушылар академиялық адалдық қағидаттарын сақтай отырып құрастырады және білім беру ұйымының әкімшілігі бекітеді.