Алматылық «Қайрат» футзал клубы жартылай финалда испандық «Картахенаны» 3:2 есебімен тізе бүктіріп, УЕФА Чемпиондар лигасының финалына шықты, - деп хабарлайды Jambylinfo.kz 

Қазақстандық команданың сапында Алиссон екі рет мергендік танытты – ол 16 және 36 минуттарда гол соқты. Тағы бір голды қақпашы Деннис Кавальканти 39-минутта енгізді. Ал испандық команданың атынан Мигель Анхель Мельядо (20-минут) және Габриэль Мотта (40-минут, пенальтиден) жауап қайырды.

Айта кетейік, бұл кездесуде негізгі фаворит ретінде «Картахена» саналған еді.

Финалда «Қайрат» португалиялық «Спортинг» пен испаниялық «Пальма» арасындағы ойында жеңіске жеткен командамен кездеседі. Бұл матч 2 мамырдан 3 мамырға қараған түні өтеді.

Айта кетерлік жайт, «Қайрат» Чемпиондар лигасының финалына соңғы рет 2019 жылы шыққан болатын. Ол кезде шешуші ойында португалиялық «Спортингке» 1:2 есебімен жол берген еді.