Қазақстандағы алғашқы атом электр станциясына атау беру туралы конкурстың нәтижесі алдағы күндері белгілі болады. Бұл туралы Атом энергиясы жөніндегі агенттік төрағасының орынбасары Ғұмар Серғазин мәлімдеді.

25 қыркүйек пен 10 қазан аралығында өткен конкурсқа 27 мыңнан астам ұсыныс түсіп, олардың ішінде тарихи әрі географиялық атаулар, сондай-ақ белгілі тұлғалардың есімдері көптеп кездескен.

"Шамамен 27 мың өтініш келіп түсті, оларды конкурстық комиссия іріктеп жатыр. Жақында оның нәтижелері туралы хабарлаймыз. Конкурстық комиссияның отырысында тиісті шешім қабылданады. Меніңше, осы айдың соңына дейін белгілі болады", – деді Ғұмар Серғазин Сенат кулуарында.