ҚАЗАҚСТАНДЫҚ АЗАМАТ АМЕРИКАДА ҚАЗАҚ ТІЛІНЕН САБАҚ БЕРЕДІ

Жұбанов университетінің түлегі Нұрсұлтан Асылов қазіргі таңда Массачусетс штатындағы Массачусетс университетінде докторантурада оқиды. Американдық студенттерге қазақ тілін үйретіп жүрген отандасымыз әлеуметтік желіде танымалдылыққа ие болуда деп хабарлайды Jambylinfo.kz Ғылым және жоғарғы білім министрлігінің баспасөз қызметіне сілтеме жасап. «15 жасымда «25 жасыма дейін көп тіл үйренемін» деп алдыма мақсат қойдым. Бүгінде ағылшын, түрік, қазақ және орыс тілдерін білемін және испан тілін үйреніп жүрмін. Мектеп бітіргеннен кейін Жұбанов университетіне шет тілдер факультетіне оқуға түстім. Мамандығым- ағылшын тілі пәнінің мұғалімі. 2019 жылы университет бітіргеннен кейін Назарбаев зияткерлік мектебінде, қазақ-түрік лицейінде мұғалім болып жұмыс істедім. Білім беру жүйесіне деген қызығушылығым одан әрі оқуға деген құлшынысым арттырды. “Білім беру саласындағы көшбасшылық” бағдарламасы бойынша Назарбаев университетіне магистратураға түстім. Еуропадағы білім беру жүйесі қалай жұмыс істейді, еліміздегі білім саласына қандай шетелдік инновациялық тәсілдерді қолдануға болатынын зерттегім келді», - дейді Нұрсұлтан Асылов. Нұрсұлтан шетелде білім алуды армандаған. Ол шетелдік 8 университетке оқуға құжат тапсырып, 2 университеттен шақырту алған. Соның бірі Массачусетс штатының Амхерст қаласында орналасқан Массачусетс мемлекеттік зерттеу университеті. Қазіргі таңда Нұрсұлтан Асылов “PhD in education” 5 жылдық бағдарламасы бойынша білім алуда. Бұл – тілдер мен мәдениеттерге ерекше көңіл бөлінетін білім беру саласындағы докторантура. Ол шетелде білім алып қана қоймай, шетелдік студенттерге қазақ тілін үйретуде. «Массачусетс университетінің лингвистика департаментінде жыл сайын еуропалық емес тілдерді оқыту бағдарламасы өткізіледі. Маған лингвистика факультетінің докторанттарына қазақ тілін үйрету ұсынылды. Мұнда Америка, Испания, Жапония және Қытайдан келген студенттер оқиды.