Биылғы жылдың қаңтарында Қазақстанда сыртқы киім бағасы өткен жылдың осы айымен салыстырғанда 10%-ға қымбаттады, - деп хабарлайды Jambylinfo.kz

Бағаның ең жоғары өсімі Түркістан, Шығыс Қазақстан және Абай облыстарында байқалды, ал Павлодар мен Жамбыл облыстарында баға ең аз көтерілді.

Ерлер киімі орташа есеппен 9,9%-ға қымбаттаған. Ерлерге арналған желеткелер, пуховиктер, футболкалар, джемперлер мен іш киімдер бағасы едәуір өскен. Әйелдер киімі 10,3%-ға қымбаттап, әсіресе желеткелер, пуховиктер, пальтолар мен іш киімдер бағасы айтарлықтай артқан. Балалар киімі де 9,7%-ға қымбаттап, ең көп қымбаттаған заттардың қатарында маусымдық сыртқы киімдер мен мектеп формасы болған.

Қазақстандағы киім бағасын әлем елдерімен салыстырғанда, джинсы шалбардың орташа бағасы 73,4 долларды, ерлерге арналған былғары аяқ киім – 98,9 долларды, брендтік спорттық аяқ киім – 98,6 долларды, ал Zara немесе H&M сияқты дүкендердегі жаздық көйлектер 43,9 долларды құрады.

Өткен жылы Қазақстанға 159,7 мың тонна киім импортталып, оның жалпы құны 2,2 миллиард долларды құрады. Импорт көлемі алдыңғы жылмен салыстырғанда 13%-ға азайған. ТМД елдерінен импортталған киім мөлшері 21,7%-ға өссе, басқа елдерден келетін импорт 23%-ға төмендеді. Ең көп киім жеткізуші елдер – Қытай, Ресей, Өзбекстан және Түркия.