Қарағандының Кирпичная көшесінде орналасқан 4 қабатты ғимараттың екінші қабатындағы түнгі клубтың ас үй бөлмесінде ағаш қалқалар мен жиһаздар жанды. Өрт сөндірушілер келгенге дейін түнгі клубтың әкімшілігі адамдарды далаға шығарды. Өрт 80 шаршы метр алаңда сөндірілді, дер хабарлайды Jambylinfo.kz 

Сондай-ақ Ақмола облысының Астрахан ауданының Астрахан ауылындағы қонақ үйлердің бірінің қазандығының шатыры жанды. Өрт сөндірушілер 35 шаршы метр алаңды шарпыған өртті сөндірді. 

Ал Қызылордада жанар-жағармай станциясынан өрт шықты. Саламатов көшесінде істемей тұрған жанар-жағармай станциясының ауласында жалпы ауданы 289 шаршы метр болатын аумақ өртке оранды. Салдарынан АЗС жанар-жағармай оператор бөлмесінің сыртқы қабырғасы зақымдалды. 

Абай облысында ТЖМ қызметкерлері моншаның өртенуіне жол бермеді. Жарма ауданының Шар қаласында жеке тұрғын үй аумағында монша шатыры жанды. Жедел жеткен өрт сөндірушілер 4 шаршы метр алаңдағы өртті сөндірді. Зардап шеккендер жоқ.