Балалар қауіпсіздігін қамтамасыз ету бүгінгі күннің басты мәселесі саналады. Оның ішінде балалар арасындағы қылмыс пен құқық бұзушылық фактілерінің алдын, оңтайлы профилактикалық шараларды жүзеге асыру айрықша назар аударуды талап етеді. Облыс әкімінің орынбасары Серік Сәлемовтың төрағалығымен өткен облыс әкімдігі жанындағы кәмелетке толмағандардың істері және олардың құқықтарын қорғау жөнінде комиссияның кеңейтілген отырысында балалар арасында қылмыс және құқық бұзушылық жасаған жасөспірімдерді оңалту бағытындағы жұмыстардың жайы айтылды, деп хабарлайды Jambylinfo.kz.

Аталған комиссия кәмелетке толмағандарға қатысты аутодеструктивті мінез-құлықты диагностикалау, олардың  діни сауаттылығын көтеру, еңбегін пайдалануда заң талаптарының орындалу барысын қадағалап,   өнерге баулу, спорттық секциялармен қамтуды жүзеге асырады. Соның есебінен қылмыстық көрсеткіштердің төмендеуіне ықпал етеді. Мәселен, Тараз қаласы әкімінің орынбасары Қайрат Исмаилдың сөзінше, оңтайлы іске асырылған профилактикалық шаралардың нәтижесінде өткен жылмен салыстырғанда шаһарда жасөспірімдер қылмысы 5,1 пайызға қысқарған.

– Жыл басынан бері қала  аумағында кәмелетке толмағандар 37 қылмыс жасаған. Соның ішінде: мектеп оқушыларымен -18 қылмыс, колледж білімгерлерімен-16, еш жерде оқимайтындармен -3 қылмыс орын алған. Жыл басынан комиссия мүшелері, білім бөлімдері, жастар орталықтары  прокуратура мобильдік қызметкерлерімен бірлесе отырып  «Жасөспірім», «Түнгі қаладағы балалар», атты Жедел профилактикалық іс-шаралары жүргізілді. Жүргізілген іс-шаралар барысында  1154 рейд ұйымдастырылса, оның  753-і мектеп жанындағы рейдтік іс-шаралар. Рейд барысында жалпы 200  әкімшілік хаттама толтырылып, түрлі қылмыстық және әкімшілік құқық бұзушылық жасағаны үшін Тараз қаласы полиция бөлімшесіне 3223 кәмелетке толмаған жас жеткізілді, – деді Қайрат Әбілханұлы.

Сонымен бірге қала әкімінің орынбасары балалар құқығын қорғауды күшейту, тұрмыстық зорлық-зомбылыққа қарсы іс-қимылдың алдын алу мақсатында 2023-2024 жылдарға арналған «Тараз қауіпсіз қала» жобасы аясында іс-шаралар атқарылып, жасөспірімдер арасындағы суицидтің алдын алу және олардың құқықтары мен салауаттылығын қамтамасыз ету жөніндегі 2023-2025 жылдарға арналған кешенді жоспарының Жол картасына сәйкес, психологиялық-педагогикалық консилиум құрамында білікті педагог-психологтар жұмыс жасап жатқандығын атап өтті. Бұдан бөлек, жиында Байзақ ауданы әкімінің орынбасары Рүстем Қасымов, Жамбыл ауданы әкімінің орынбасары Мақпал Досымбекова мен Жуалы ауданы әкімінің орынбасары Анар Ахметова  балалар қауіпсіздігін қамтамасыз ету бағытындағы жұмыстар жайын баян етті.

Сондай-ақ, аталған комиссия отырысында облыстық психологиялық орталықтың директоры Ришат Райф орталық тарапынан атқарылған жұмыстарға тоқталды.

– Облыс әкімдігі білім басқармасы «Облыстық психологиялық қолдау орталығы» қызметінің  ұйымдастыруымен жасөспірімдердің деструктивті және аутодеструктивті мінез-құлықтың алдын алу мақсатында қала және аудан мектептерінің 5-11 сынып аралығындағы оқушыларынан әлеуметтік сауалнама алынып, қорытынды нәтижелері жинақталуда. Сонымен бірге Байзақ ауданы, Қостөбе ауылы, Қостөбе атындағы орта мектебінде өз-өзіне қол жұмсауға ұмтылу және Т.Рысқұлов ауданы, Қарақыстақ ауылдық округі, Тасшолақ ауылының тұрғыны кәмелет жасына толмаған жасөспірімнің өзіне-өзі қол жұмсау орын алуына байланысты мән-жайды анықтау мақсатында аталған аудандарға арнайы ведомствоаралық жұмыс тобы құрылып, зерделеу жүргізілді. Жасөспірімдердің  ата-аналары мен отбасы мүшелеріне психологиялық көмек көрсетілді. Білім беру ұйымдарындағы директорлардың, тәрбие, құқық ісі жөніндегі орынбасарлардың, педагог-психологтардың, әлеуметтік педагогтардың сапалық құрамы жаңа оқу жылына жинақталды. Сол сияқты аталған бағыттағы іс-шаралардың  жоспары мектеп әкімшіліктеріне  жолданды, – Ришат Еркінұлы.

Жиын соңында комиссия төрағасы Серік Сәлемов балалар қауіпсіздігі қашанда бірінші орында екендігін атап өтіп, бұл бағытта бірлескен жұмыстар өз жалғасын табатындығын жеткізді.

– Бүгінгі қоғамның алдында тұрған бас­ты міндеттердің бірі – балалар мен жасөспірімдер арасындағы құқық бұзушылықтың алдын-алу, кәмелетке толмағандар арасындағы қылмыстың өсуіне жол бермеу. Бұл мәселе қазіргі таңда көкейкесті мәселелердің біріне айналып отыр. Соныдықтан бұл бағытта бірлескен жұмыстарды нәтижелі іске асыру аса маңызды, – деді Серік Жақсылықұлы.