«Соттан тыс банкроттық процедураны қолдану» мемлекеттік қызметі eGov.kz порталы мен eGov Mobile қосымшасында қолжетімді. Соттан тыс банкроттық рәсімін қолдану және тоқтату туралы өтініш беруге болады, деп хабарлайды ҚазАқпарат «Ұлттық ақпараттық технологиялар» АҚ қоғаммен байланыс басқармасына сілтеме жасап. Бүгін, 3 наурызда күшіне енген «Қазақстан Республикасы азаматтарының төлем қабілеттілігін қалпына келтіру және банкроттығы туралы» Заңға сәйкес eGov.kz порталында және eGov Mobile мобильді қосымшасында банкроттыққа өтінішті борышкердің өзі ғана бере алады. Өтініш берер алдында борышкер алдымен мына мәліметтерді тексеру керек: - банктер, микроқаржы ұйымдары, коллекторлық агенттіктер алдындағы берешек 5,5 млн теңгеден аспауы тиіс және мерзімі кемінде 12 ай болуы керек; - ортақ меншікті мүлікті қоса алғанда мүліктің меншік құқығында болмауы; - банктің немесе микроқаржы ұйымының шарт талаптарын өзгертуден бас тарту туралы жауабын ұсыну (банктің немесе микроқаржы ұйымының жауабы болмаған жағдайда, борышкер өтінішінің көшірмесі немесе өтініштің электрондық форматта жіберілгені туралы растама); - егер қарыз 5 жылдан артық өтелмесе, онда аталған шарттың бірде-бірі ескерілмейді; - АӘК алушылары саналатын борышкерлер 6 ай бойы осы рәсімді қолдану үшін мерзімі өтіп кеткен уақытты есепке алмай өтініш бере алады; - мобильді азаматтар базасында (МАБ) борышкер мен жұбайының телефон нөмірінің тіркелгенін тексеру керек. Ұялы нөмірді тіркеу үшін сілтеме бойынша өту керек – my.egov.kz. «Құрметті пайдаланушылар, eGov.kz порталында және Халыққа қызмет көрсету орталығында барлық қажетті құжаттарсыз өтініш берудің мәні жоқ, ең алдымен екінші деңгейлі банктерден қажетті растауларды алыңыздар. Осыдан кейін ғана жеке тұлғаның банкроттығына өтініш беруге болады», - дейді «Ұлттық ақпараттық технологиялар» АҚ Басқарма төрағасы Ростислав Коняшкин. EGov.kz порталындағы жаңа қызметті порталдың басты бетінде және «Азаматтарға» - «Кеден және салықтар» - «Экономика және қаржы» бөлімінен табуға болады. Аналогиялық қызмет eGov Mobile мобильді қосымшасының «Арнайы қызметтер» бөлімінде қолжетімді. Соттан тыс банкроттыққа өтініш беру үшін: - «Қазақстан Республикасы азаматтарының төлем қабілеттілігін қалпына келтіру және банкроттығы туралы» Заңда көзделген азаматты банкрот деп тану туралы соттан тыс арыз беру шарттарының сақталуын растау; - некеде болу жағдайында жарының ЖСН-ін көрсету; - несиелер бар қаржы институттары туралы мәліметтерді толтыру; - салық органын көрсету және құжаттардың көшірмелерін қосу; - АӘК алушы болса, белгі қою; - егер міндеттемелерді орындау мерзімі 5 жылдан астам болса, белгі қою; - өтінішке бір реттік құпия сөз немесе ЭЦҚ арқылы қол қою; - өтінішті жібергеннен кейін өтініш берушінің жары Жеке кабинетте өтінішті мақұлдайды. Қызмет нәтижесі 15 жұмыс күні ішінде Жеке кабинетте шешімге сілтеме түрінде пайда болады. Шешімді ҚР Қаржы министрлігі сайтынан қарауға болады. Соттан тыс банкроттық рәсімі 6 айға дейін созылады. Сонымен қатар, аталмыш қызмет банкроттық туралы соттан тыс іс жүргізуді тоқтату туралы өтініш беруді қарастырады. Рәсім пайдаланушы туралы ақпарат жарияланған күннен бастап 6 айда қарастырылады. Жаңа қызмет «Ұлттық ақпараттық технологиялар» АҚ, Цифрлық даму, инновациялар және аэроғарыш өнеркәсібі министрлігінің мен Қаржы министрлігінің бірлескен жұмысының арқасында іске асырылды.