Щучинск-Бурабай курорттық аймағындағы байланыс мәселесі көптен бері туристер мен жергілікті тұрғындардың наразылығын тудырып келеді, - деп хабарлайды Jambylinfo.kz

Кей жерлерде мобильді интернет мүлдем ұстамайды, ал қоңырау шалу қиынға соғады.

Қазақстанның бірінші вице-премьері Роман Скляр Бурабайда байланыс сапасының төмен учаскелері бар екенін растады. Бұл мәселені шешу үшін өңірде цифрландыру бойынша Жол картасы іске асырылуда. Оның аясында алты жаңа антенна-діңгек құрылысын жүргізу жоспарланған:

Aqbura Park демалыс орнында;
Абылай хан алаңында;
Жезқазғанец балалар шипажайының аумағында;
Энергоинформ АҚ-ның оқу-өндірістік кешені маңында;
Бурабай мемлекеттік ұлттық табиғи паркі аумағында;
Жукей ауылындағы «Ақ-Жол» қонақ үйінің жанында.

Бұған қоса, жаңа базалық станциялар Сұлтан Плаза демалыс үйінің маңында және Көгілдір бұғаз аймағында орнатылады (мұнда биік мачталар салынбайды).

Кселл компаниясы Абылай хан алаңына антенна, ал Көгілдір бұғазға арнайы байланыс жабдықтарын орнатты. Қазір қалған базалық станцияларды іске қосу жұмыстары жеделдетілуде. Билік барлық станция 2025 жылдың бірінші тоқсанының соңына дейін іске қосылады деп мәлімдеді.