Сенат төрағасы Мәулен Әшімбаев Қазақстан президентін кезектен тыс сайлау кезінде Мемлекет басшысы Қасым-Жомарт Тоқаевтың сенімді өкілі болу мүмкіндігіне қатысты сұраққа жауап берді, деп хабарлайды ҚазАқпарат . Айта кетейік, 2019 жылы М.Әшімбав сайлау кезінде Қасым-Жомарт Тоқаевтың сенімді өкілі болған еді. Осы орайда бүгін палатаның жалпы отырысынан кейін тілшілер Сенат төрағасынан биылғы сайлауда қайтадан сенімді өкіл болуы мүмкіндігі туралы сұрады. «Егер Мемлекет басшысы Қасым-Жомарт Кемелұлы сенімді өкіл болуыма және басқа да өкілдірмен бірге сайлау науқанына қатысуыма сенім артса, онда бұл қызметті атқаруға дайынмын. Бұл іс-шаралар заң аясында өткізіледі», - деді М. Әшімбаев. Сенат төрағасы заңнамада сенімді өкілдің міндеттері толық қамтылғанын айтты. «Бұл нормалар заңда ескерілген. Егер осындай міндет жүктелсе, сайлау науқанына белсенді түрде қатысып, Қасым-Жомарт Кемелұлының сайлау алдындағы бағдарламасының негізгі тезистерін азаматтар мен қоғамға жеткіземін», - деді М. Әшімбаев.