IX қысқы Азия ойындары: Қазақстандық спортшыларға арнайы аспаздар жіберіледі, деп хабарлайды Jambylinfo.kz

Қазақстандық спортшылар Қытайдың Харбин қаласында өтетін IX қысқы Азия ойындарында қалыпты тамақтану үшін арнайы аспаздармен қамтамасыз етіледі. Бұл туралы Туризм және спорт министрі Ербол Мырзабосынов мәлімдеді.

«Спортшыларымыздың тамақтану мәселесі толығымен шешілді. Азия ойындары барысында бұл өте маңызды. Біздің мамандар құраманың келуінен бұрын барып, барлық ұйымдастыру жұмыстарын, оның ішінде тамақтану мен тұруды реттейді. Сонымен бірге жаттықтырушылар, дәрігерлер және журналистерді аккредитациялау мәселелері де қарастырылды», – деді министр.

IX қысқы Азия ойындарына еліміздің әр аймағынан 138 спортшы қатысады. Ойындар 2025 жылдың 7-14 ақпан аралығында өтеді.

Министр сондай-ақ демеушілер сыйлаған спорттық киімдер мен оған жұмсалған қаржының нақты көлемі туралы ақпаратты жарияламады.