Кореялық компания Жамбыл облысында жылу электрстанциясын салады

Компания президенті Ким Чун Хо Securo компаниясының ағымдағы қызметі, инвестициялық жобалары және алдағы жоспары туралы хабарлады. Сондай-ақ, ол инфрақұрылымдық жобаларды іске асыруда, архитектуралық жобалауда жаңа технологияларды қолдану,  экологиялық таза электр энергиясын өндіруде, IT саласында заманауи тәсілдерді пайдалану жөнінде жан-жақты тоқталды. Нұржан Нұржігітов кәсіпкерді өңірді дамытудың негізгі бағыттарымен таныстырып, агроөнеркәсіп кешенін, өнеркәсіпті, жаңартылатын энергия салаларын дамыту бағытындағы жұмыстарды атап өтті. Аймақ басшысы мен кореялық компания президенті энергетика саласындағы бірлескен жобаларды жүзеге асыру барысын жан-жақты талқылады. Компания облысымызда қуаттылығы 270 МВт жылу электр станциясын салуды жоспарлап отыр. Ол бойынша 500 жаңа жұмыс орнын ашу көзделуде. Жоба құны 180 млрд. теңгені құрайды. Сондай-ақ тараптар 400 жаңа жұмыс орны құрылатын (өндірістік қуаты – жылына 60 мың тонна) ферросилиций өндіру жобасын іске асыру жоспарын қарады. Кездесуде облыс орталығындағы Smart-city құрылысы барысында ІТ-технологияларды енгізуге айрықша назар аударылды.

Аймақ басшысы мемлекеттік бағдарламалар аясында жергілікті атқарушы органдар тарапынан жан-жақты қолдау көрсетілетінін атап өтті. Ким Чун Хо Жамбыл облысындағы жаңартылатын энергия секторын дамытудағы жұмыстарды жоғары бағалап, жобаларды қолдау білдірген өңір басшылығына алғысын жеткізді.