Мемлекет басшысы Қасым-Жомарт Тоқаевтың бастамасымен жүзеге асқан бұл жоба – ел болашағы саналатын балалардың әлеуметтік жағдайын жақсартуға бағытталған маңызды қадам.

Бағдарлама аясында еліміздің 18 жасқа толмаған барлық балаларына жыл сайын Ұлттық қордан қаражат аударылып отырады. Бұл қаражат тек екі мақсатта – білім алу және тұрғын үй жағдайын жақсарту үшін ғана пайдаланылуы мүмкін.

2024 жылы бағдарламаға 6 919 131 бала қатысты. Олардың әрқайсысының шотына 100,52 АҚШ доллары мөлшерінде қаражат аударылды. Жалпы сомасы – 695,5 млн доллар. 2025 жылы бұл көрсеткіш 129,38 долларға дейін артты. Ал екі жыл қатарынан қатысқан балалардың жинағы 232,94 долларды құрады.

Бағдарлама аясында жинақталған қаражатты тексеру үшін бірнеше ыңғайлы тәсілдер бар:

kids.enpf.kz сайты арқылы (ЖСН енгізу қажет);

eGov.kz порталы мен eGov Mobile қосымшасы;

Kaspi.kz және Halyk Bank мобильді қосымшалары.

Барлық ақпарат ашық әрі қолжетімді. Жинақтар БЖЗҚ (Бірыңғай жинақтаушы зейнетақы қоры) шотында сақталады және 18 жасқа толғанда Отбасы банкі немесе Халық банкі арқылы рәсімделіп, пайдаланылады.

Білім мен баспана – басты бағыт

2025 жылдың 1 қаңтарына дейін бағдарлама бойынша:

66 571 өтініш қабылданды;

Соның ішінде 53 001 өтініш мақұлданып, 5,3 млн доллар көлемінде төлем жасалды;

Тұрғын үй алуға – 34 388 өтініш түсіп, оның 29 542-сі орындалды;

Білім алуға – 32 183 өтініштің 23 459-ы қанағаттандырылды.

Бүгінгі таңда бағдарламаға 6 921 035 бала қатысып жатыр (2007–2024 жылдары туған). Олардың ішінде 324 430 жас биыл 18 жасқа толып, жинақтарын нақты мақсаттарға пайдалана алады.

«Ұлттық қор – балаларға» бастамасы – бұл тек қаржылық қолдау емес, бұл – жас ұрпаққа көрсетілген сенім. Жоба арқылы мемлекет әр балаға болашағын жоспарлап, білім мен баспананы арман емес, қолжетімді мүмкіндікке айналдырып отыр.