Халықтың әлеуметтік осал тобынан шыққан студенттердің пәтер жалдау шығындары өтелуі мүмкін. Бұл жайында Премьер-Министрдің орынбасары Алтай Көлгіновтің Мәжіліс депутаттары сауалына берген жауабында айтылған, деп хабарлайды Жамбылинфо ҚазАқпарат сайтына сілтеме жасап. «Мемлекет басшысының тапсырмасын орындау аясында халықтың әлеуметтік осал топтарының жекелеген санаттары қатарынан басқа қаладан келген студенттердің жатақханада тұруға жұмсалатын шығынын субсидиялау мәселесі пысықталып жатыр. Оқу-ағарту, Ғылым және жоғары білім министрліктерінің деректері бойынша 2022-2023 оқу жылында жоғары оқу орындары мен колледждерде халықтың әлеуметтік осал топтары санатынан шамамен 218,5 мың студент (ЖОО-да 168,1 мың адам, колледждерде 50,3 мың адам) оқып жүр. Осыған байланысты үш жылдық бюджетке қосымша қажеттілік шамамен 54,7 млрд теңгені (ЖОО студенттеріне – 42 млрд теңге, колледждер – 12,7 млрд теңге) құрайды», - деп атап өтеді Үкімет басшысының орынбасары. Сонымен қатар вице-премьер студенттердің пәтер жалдауға жұмсайтын шығындарын өтеу үшін Оқу-ағарту, Ғылым және жоғары білім министрліктері республикалық бюджеттің мүмкіндіктерін ескере отырып, мемлекеттік әлеуметтік көмекке ең мұқтаж екі санатты анықтағанын айтады. «Олар - жетім және ата-анасының қамқорлығынсыз қалған студенттер (1 846 адам), мүгедектігі бар адамдар, бала кезінен мүгедектігі бар адамдар, мүгедектігі бар балалар (758 адам). Үш жылдық бюджетке қажеттілік - шамамен 1,9 млрд теңге», - деді Алтай Көлгінов.