"Назарбаев емеспін": Депутат Мақсат Толықбай інісі жүргізген "Бірақ..." бағдарламасына пікір білдірді
Осыдан бірнеше күн бұрын «Хабар» арнасындағы «Бірақ» бағдарламасы қоғамның сынына ұшырап, оның соңы бағдарламаның жабылуымен аяқталды. Бағдарлама жүргізушісі Қарасай аудандық мәслихат депутаты Самат Толықбайға екені белгілі болды. Шулы мәселеге Самат Толықбайдың ағасы ҚР Парламенті Мәжілісінің депутаты Мақсат Толықбай пікір білдірді, -деп хабарлайды jambylinfo.kz.
Мәжіліс кулуарында тілшілердің бірі осы жағдайға қатысты Мақсат Толықбайдың пікірін білді.
"Ол бірдеңе бүлдіріп қоятындай мектеп оқушысы емес – үш баланың әкесі. Өз іс-әрекетіне өзі жауап береді. Бұрынғы журналист ретінде пікірімді білгіңіз келсе, әрине, қарсымын. Тақырып таңдаудан бастап барлығы дұрыс болған жоқ. Жүргізуші дайын сценарийді оқи салды деп айтуға да болмайды. Тәжірибесі аз шығар, бұл жерде редакторлардың да кінәсі бар. Мен министрліктің бағдарламаны жапқан позициясын қолдаймын. "Бірақ..." бағдарламасы болсын, "Қалаулым", "Қосылайық" сияқты бағдарламаларды мүлдем жабу керек. Осы үшін күресіп келе жатырмыз. Қазір заң нормаларына өзгеріс енгізе алсақ, біз үшін үлкен жеңіс болады", - деді депутат.
Мәжіліс депутатының сөзінше, інісінің бағдарлама жүргізуіне ол ықпал етпеген.
"Ол – мәслихат депутаты. Біздің партияның атынан түскен жоқ, сол жердегі жергілікті тұрғындар ұсынды. Ал мына жақтағы бағдарламаға кім шақырғанын білмеймін. Мен қазір біреуді бір қызметке қоя алатындай, туған-туыстарымды жұмысқа алатындай бұрынғы Назарбаев сияқты емеспін. Менің ондай құзыретім жоқ. Бар болса да қолданбас едім. Сондықтан әркім өз тірлігі үшін өзі жауап береді", - деп түсіндірді Мақсат Толықбай.
Дереккөз: "Stan.kz"
.