Қоғам болып күш біріктіріп, жұмыла жұмыс жасауымыз керек

Өткен Парламент Мәжілісі отырысында депутаттар осыдан бір жыл бұрынғы бүкіл елге сабақ болған қайғылы оқиғаны талқылады. Бүгінгі таңда бүкіл Қазақстан үшін басты мақсат – жаңа кезеңге ауыртпалықсыз өту және бар әлеуетті іске асыру. Болашақта қайғылы жағдайдың қайталануының алдын алу және толық қалпына келтіру шарттарының бірі – жастармен тиянақты жұмыс жасау. Елімізде бірнеше жылдан бері жұмысқа қабылдау және жоғарылату мәселелерінде меритократия принципіне бет бұрып келеді. Бұл ең алдымен жастарға қатысты, өйткені күш пен ынта-жігерге толы жастар әрқашан басқаларға қарағанда еңбек етуге ынталы. Ал, белсенділікті әділ көтермелеу материалдық жағынан да көмектеседі, бұл өз кезегінде одан әрі ынталандырады. Қазақстан Республикасының Бас Прокуроры Берік Асылов өз сөзінде тергеудің аяқталуға жақын екенін атап өтті. Оның айтуынша, бүгінде болған оқиғаның барлық зардаптары қалпына келтіріліп, тергеу органдарының хронологиясы бойынша негізгі ұйымдастырушылар анықталып отыр. Қайғылы оқиғалардың құрбандары қатарында жастардың болғаны да қынжылтады. Мемлекет басшысы сөздерінде жастар арасындағы жұмыссыздық мәселесін жиі айтады. Ал, бұл бағыттағы жұмыс елдегі жағдайды айтарлықтай жақсартуға мүмкіндік береді, яғни бұл бейбітшілік пен тәртіпті қамтамасыз етудегі басымдық болып табылады. Мәселен, өткен жылдың өзінде облыста 28 мыңнан астам жас белсенді жұмыспен қамту шараларына тартылып, жұмыссыздық деңгейі республика бойынша орташа деңгейден төмен болды. Парламент Мәжілісінің отырысында қайғылы қаңтардың Тәуелсіздікке жасалған қастандық екені айтылды. Ал, Президентіміздің батыл қадамдары, халқымыздың бірлігі мен ынтымағы, қатардағы полицейлердің, дәрігерлердің, еріктілердің және тағы басқалардың ерлігінің арқасында ғана мемлекеттігімізді қорғап, елді аласапыранға батырмадық. Бұл сабақты ұзақ жылдар бойы бейбіт аспан астында есте сақтау керек. Алдағы уақытта осындай жағдайлар қайталанбас үшін қоғам болып күш біріктіріп, жұмыла жұмыс жасауымыз керек.  Жомарт Зұлпыхар Жамбыл облысы әкімдігінің жастар саясаты мәселелері басқармасының басшысы