ҚР Ұлттық банкі мен Қытай Халық банкі арасында ынтымақтастық туралы Меморандумға қол қойылды, деп хабарлайды  Ұлттық банктің ресми сайты. Ондағы мәліметтерге қарағанда, Меморандум Қаржылық ынтымақтастық жөніндегі Қазақстан-Қытай кіші комитетінің өзара есеп айырысуда ұлттық валюталарды қолдану туралы шешімдерін іске асыру аясында Қазақстанда юаньмен өзара есеп айырысуды дамытуға бағытталған. Меморандум клиринг және ұлттық валюталардағы трансшекаралық есеп айырысуларды дамыту жөніндегі деректермен алмасу мәселелері бойынша орталық банктердің уағдаластықтарын бекітеді. «Меморандум жасасу – Қазақстан мен Қытай арасында қаржы саласындағы Қазақстан-Қытай ынтымақтастығын нығайтудағы жаңа қадам болып табылады және трансшекаралық есеп айырысуларда ұлттық валюталарды неғұрлым кеңінен пайдалануға, сондай-ақ өзара сауда және инвестициялық қызметті дамытуға ықпал етеді»,-делінген хабарламада.