Семейде оқушыны соққыға жыққан жасөспірімдерге сот үкім шығарды
Тергеу барысында жасөспірімдер баланы қазандық маңына апарып, соққыға жыққаны анықталды. Олардың үшеуі болған оқиғаны видеоға түсірген. Кейін бұл жазба әлеуметтік желілерде таралды.
Абай облысының кәмелетке толмағандар ісі жөніндегі мамандандырылған ауданаралық соты 11 жастағы оқушыны ұрып-соғуға қатысқан алты жасөспірімге қатысты азаматтық істерді қарады, - деп хабарлайды Jambylinfo.kz
Сот шешімі бойынша 13 және 16 жастағы екі қыз төрт айға арналған девиантты мінез-құлықты балаларға арналған арнайы мектепке жіберілді. 13 жастағы тағы бір ұл ерекше режимдегі мектепке алты айға жіберілді.
Ал үш жасөспірімге арнайы мектепке жіберу туралы талап қанағаттандырылған жоқ. Оның себебі – екеуінің жасы 11-ден кіші, ал заң бойынша тек 11 жастан бастап арнайы мектепке орналастыру мүмкін. Ал 12 жастағы қыз бұрын құқық бұзушылық жасамаған және оқу үлгерімі жақсы болғандықтан, оны ювеналды полицияның бақылауына алды.
Сот шешімі әлі заңды күшіне енген жоқ.