ҚАЖ қызметкерлері тарапынан түзеу мекемелерінде жаза басып жазалы болғандардың алдағы өмірі дұрыс жалғасуы үшін атқарылып жатқан жұмыстар жетерлік. Мәселен, тәртіп сақшылары сотталғандарды түзеу жолына салу мақсатында тәлімі берік тәрбие жұмыстарын жүйелі жүргізеді. Ең маңыздысы, оларды ақылы еңбекпен қамту жолға қойылған. Бүгінде өңірлік Қылмыстық-атқару жүйесі департаментіне бағынысты №58 түзеу мекемесінде жазасын өтеушілердің басым бөлігі осы мекеменің өндіріс аймағында ақылы жұмысқа орналасқан. Жазасын өтеушілердің «екі қолына бір күрек» тапқан жеке кәсіпкерліктің бірі – Луина. Дәл қазір мұнда 3 адам ақылы жұмысқа орналасып, кәсіпкерліктің меншігіндегі цехта брусчатка жасаумен айналысуда.