Теңге Трамп пен Путиннің әңгімесінен кейін нығайды
Инвесторлар бұл жаңалықты оң қабылдап, тәуекелді активтерге деген сұраныс бірден артты.
Нәтижесінде теңге нығайып, дамушы елдердің валюталары қосымша қолдауға ие болды, - деп хабарлайды Jambylinfo.kz
Ең үлкен серпілісті ресейлік нарық сезінді – Мәскеу биржасының индексі жылдық максимумды жаңартып, 3060 пунктке дейін көтерілді. Әсіресе "Газпром" акцияларының өсімі ерекше байқалды. Қаржыгер Арсен Темірбаевтың пікірінше, бұл рубльдің бағамы мен мұнай бағасының динамикасында психологиялық фактор барын және геосаяси ахуалдың жұмсаруына деген үміттің ескерілгенін көрсетеді.
Рубль нығаюын жалғастыруда: Мәскеу биржасында доллар бағамы 94 рубльден төмен түссе, юань 12,65 рубльге дейін арзандады. Қазақстандық теңге де осы бағытта қозғалып келеді. Ұлттық валютаға негізгі қолдау экспорттық кірістің ағымынан түсуде, ал шетел валютасына сұраныс қалыпты деңгейде сақталып отыр. Бұл қатаң ақша-несие саясаты мен импорттаушылар белсенділігінің маусымдық төмендеуімен байланысты.