Бұл туралы Қазақстан-Украина бизнес форумында айтылды, деп хабарлайды Жамбылинфо Ulysmedia.kz. сайтына сілтеме жасап. Шараға қатысқан украиналық бизнес-топтар іскерлік ынтымақтастықты жандандыруға ынталы екендерін жеткізді. Қазақстанның Украинадағы төтенше және өкілетті елшісі Дархан Кәлетаевтың айтуынша, қиын жағдайларға қарамастан, украиналық және қазақстандық бизнес белсенді ынтымақтасып жатыр.

«Әрине, егер 2012 жылмен салыстырсақ, 2012 жылы біздің елдеріміз арасындағы тауар айналымы 5 млрд доллардан асқан. Өткен жылдың 11 айы қорытындысы бойынша сауда айналымы 500 млн доллардан асты. Менің ойымша, бұл жақсы көрсеткіш, 500 млн доллар – бейбіт уақытта да әр елде бола бермейтін сауда айналымы», – деп атап өтті Дархан Кәлетаев.

Қазақстан біз үшін маңызды экономикалық серіктес болып қала береді, дейді украиналықтар.

«Біз сауда-экономикалық қатынастарды дамытуға мүдделіміз. Бізде қалыптасқан дәстүрлер бар және жаңа мүмкіндіктер іздеуді жалғастыруымыз керек», – деді Украинаның Сауда-өнеркәсіп палатасының президенті Геннадий Чижиков.

Украинада энергетикалық инфрақұрылым нысандары қатты зардап шекті, онда орасан зор инвестициялар, соның ішінде ЖЭК жобалары қажет болады, деп атап өтті форум қатысушылары. Сондай-ақ, украиналық бизнес ҚР аумағында өз кәсіпорындарын көшіру және ҚР-дан тауарларды тікелей жеткізуге мүдде танытты.