Жәнібек Әлімханұлы жеңіліп көрмеген бразилиялық боксшымен жекпе-жек өткізуге келісті

WBO нұсқасы бойынша орта салмақтағы әлем чемпионы қазақстандық Жәнібек Әлімханұлы (12-0, 8 КО) Бүкіләлемдік бокс ұйымы рейтингісінің үшінші сатысында тұрған бразилиялық Эскива Фалькаомен (30-0, 20 КО) жекпе-жек өткізуге келісті, деп хабарлайды Sports.kz сайты. Бір күн бұрын Фалькао Әлімханұлына жекпе-жек өткізуге кезекті ұсыныс білдірді. Жауап ретінде «Қазақ стилі» Фалькаоға нақты ұсыныс болған жағдайда Эскивамен айқасуға қарсы емес екенін айтып, оның командасымен осындай жекпе-жекті талқылауды ұсынды. Бұған дейін Жәнібек Әлімханұлы бразилиялық боксшыға басқаша жауап беріп, алғашында: «Маған чемпиондық атағы жоқ боксшылар қызық емес» деп, кейін 2012 жылғы Олимпиада жүлдегеріне «мүгедектер арбасына отырғызамын» деп сес көрсеткен болатын.